ചെന്നൈ: ദേശീയ മനുഷ്യാവകാശ കമ്മീഷൻ അധ്യക്ഷനായി ജസ്റ്റിസ് വി രാമസുബ്രഹ്മണ്യനെ നിയമിച്ചു. രാഷ്ട്രപതി ദ്രൗപദി മുർമു ആണ് അദ്ദേഹത്തെ നിയമിച്ചുകൊണ്ടുള്ള ഉത്തരവ് പുറത്ത് ഇറക്കിയത്.

തമിഴ്നാട്ടിൽ നിന്നുള്ള സുപ്രീം കോടതി മുൻ ജഡ്ജിയാണ് രാമസുബ്രഹ്മണ്യൻ. സുപ്രീം കോടതി മുൻ ചീഫ് ജസ്റ്റിസ് അരുൺ മിശ്ര ജൂൺ ഒന്നിന് സ്ഥാനമൊഴിഞ്ഞ ശേഷം അധ്യക്ഷ സ്ഥാനം ഒഴിഞ്ഞു കിടക്കുകയായിരുന്നു.

നേരത്തെ ഹിമാചൽ പ്രദേശ് ഹൈക്കോടതി ചീഫ് ജസ്റ്റിസായിരുന്നു. മദ്രാസ് ഹൈക്കോടതി, തെലങ്കാന ഹൈക്കോടതി എന്നിവിടങ്ങളിലും ജഡ്ജിയായിരുന്നു. 2023 ജൂൺ 29നാണ് സുപ്രീം കോടതിയിൽ നിന്നു വിരമിച്ചത്. 2016ൽ നോട്ട് അസാധുവാക്കൽ നയവുമായി ബന്ധപ്പെട്ട് വാദം കേട്ട ബഞ്ചിൽ അം​ഗമായിരുന്നു രാമസുബ്രഹ്മണ്യൻ.

1958 ജൂൺ 30ന് മന്നാർ​ഗുഡിയിലാണ് രാമസുബ്രഹ്മണ്യൻ ജനിച്ചത്. ചെന്നൈ വിവേകാനന്ദ കോളജിൽ നിന്നു സയൻസിൽ ബിരുദം നേടിയ അദ്ദേഹം മദ്രാസ് ലോ കോളജിൽ നിന്നാണ് നിയമ പഠനം പൂർത്തിയാക്കിയത്.