സാദിക്കലി ശിഹാബ് തങ്ങളുടെ നേതൃത്വത്തിലുള്ള സംഘം ന്യൂയോർക്ക് ഇന്ത്യൻ കോൺസിൽ ജനറലുമായി കൂടിക്കാഴ്ച്ച നടത്തി

ന്യൂയോർക്ക്: ഐയുഎം’എൽ നാഷണൽ പൊളിറ്റികൽ അഡ്വൈസറി ബോർഡ് ചെയർമാൻ പാണക്കാട് സയ്യിദ് സാദിക്കലി ശിഹാബ് തങ്ങളും രാജ്യസഭാംഗം അഡ്വ. ഹാരിസ് ബീരാനും ന്യൂയോർക്ക് ഇന്ത്യൻ കോൺസിൽ ജനറൽ ബിനായ ശ്രീകാന്ത പ്രധാനുമായി ന്യൂയോർക്ക് കോൺസുലേറ്റിൽ വെച്ച് സംഭാഷണം നടത്തി. അമേരിക്കയിലെ ഇന്ത്യൻ പ്രവാസികൾ നേരിടുന്ന വിവിധ വിഷയങ്ങളെ കുറിച്ച് അവർ സംസാരിച്ചു.

നേതാക്കളുടെ അമേരിക്കൻ സന്ദർശനത്തിന്റെ ഭാഗമായി വിവിധ സംസ്ഥാനങ്ങളിൽ നിന്നുള്ള പ്രവാസികളിൽ നിന്ന് ലഭിച്ച പല നിർദ്ദേശങ്ങളും അഭിപ്രായങ്ങളും ആവശ്യങ്ങളും അടങ്ങിയ രൂപരേഖ തയ്യാറാക്കിക്കൊണ്ട് സാദിക്കലി ശിഹാബ് തങ്ങളുടെ നേതൃത്വത്തിലുള്ള സംഘം കോൺസുലർ ജനറലുമായി ന്യൂയോർക്ക് ഇന്ത്യൻ കോൺസുലേറ്റിൽ വെച്ച് പര്യടനത്തിന്റെ അവസാന ദിവസമാണ് കൂടിക്കാഴ്ച നടത്തിയത്. പ്രവാസികളെ നേരിട്ട് ബാധിക്കുന്ന വിഷയങ്ങളായ യാത്ര പ്രശ്നങ്ങൾ, സീസൺ കാലത്ത് വിമാന ചാർജിന്റെ വർദ്ധനവ്, ഒ.സി.ഐ കാർഡ് വിഷയം,അമേരിക്കയിൽ പാസ്പോർട്ട് പുതുക്കി കിട്ടാൻ ബുദ്ധിമുട്ട് അനുഭവിക്കുന്ന മലയാളികളുടെ പ്രശ്നങ്ങൾ, അമേരിക്കൻ സിറ്റിസൺഷിപ്പ് എടുത്ത ഇന്ത്യക്കാർ നാട്ടിൽ നേരിടുന്ന പ്രശ്നങ്ങൾ തുടങ്ങി വിവിധ പ്രവാസി വിഷയങ്ങൾ വളരെ വിശദമായിത്തന്നെ സംസാരിച്ചു. മുൻകൂട്ടി നിശ്ചയിച്ച പ്രകാരമാണ് കോൺസുലർ ജനറൽ നേതാക്കളുമായി കൂടിക്കാഴ്ച .

ശിഹാബ് തങ്ങളെക്കുറിച്ചു നേരത്തെ ധാരാളം കേട്ട് പരിചയമുള്ള കോൺസുലർ തങ്ങളെപ്പോലെയുള്ള ആദരണീയനായ ഒരു നേതാവ് കോൺസുലേറ്റിൽ വന്നതിൽ അതിയായ സന്തോഷവും ചാരിതാർത്ഥ്യവും പ്രകടിപ്പിച്ചു. കൂടാതെ ദീർഘകാലമായി ഡെൽഹിയിലുള്ള അഡ്വ ഹാരിസ് ബീരാനെ ക്കുറിച്ചും സന്ദർശന സംഘത്തിലുള്ള ഷെഖീഖ് അടക്കാപലരുമായും കേന്ദ്ര വിദേശ കാര്യ വകുപ്പിലെ പല ഉദ്യോഗസ്ഥർക്കുമുള്ള ബന്ധങ്ങൾ കോൺ സിൽ ജനറൽ ചുണ്ടിക്കാട്ടി.മുൻ കേന്ദ്ര വിദേശകാര്യ സഹമന്ത്രി ഇ.അഹമ്മദ് കേന്ദ്രമന്ത്രിയായിരിക്കെ മിനിസ്റ്ററി ഓഫ് എക്സ്റ്റേർണൽ അഫയേഴ്സ് വകുപ്പുമായി ബന്ധപ്പെട്ടു പല സുപ്രധാന നേട്ടങ്ങളും കേട്ട് അറിവുള്ള കോൺസുലർ ജനറൽ അക്കാര്യങ്ങളും ഇ. അഹമ്മദിന്റെ ഭരണ നൈപുണ്യങ്ങളും, സവിശേഷതകളും അനുസ്മരിച്ചു. കോൺസുലർ ജനറലിന്റെ ചായ സൽക്കാരത്തിലും അവർ പങ്കെടുത്തു. സാദിക്കലി ശിഹാബ് തങ്ങളെയും ഹാരിസ് ബീരാൻ എം.പിയെയും കൂടാതെ പ്രവാസി പൊതു പ്രവർത്തകരായ കെ,എം.സി.സി യു.എസ്.എ
പ്രസിഡണ്ട് യു എ നസീർ, യു.എ.ഇ കെ. എം.സി,സി ജനറൽ സെക്രട്ടറി പി.കെ അൻവർ നഹ, എരഞ്ഞിക്കൽ ഹനീഫ്, മുസ്തഫ കമാൽ എന്നിവരും സന്നിഹിതരായിരുന്നു. അമേരിക്കൻ പര്യടനം പൂർത്തിയാക്കി സാദിക്കലി ശിഹാബ് തങ്ങളും ഹാരിസ് ബീരാൻ എം.പിയും സംഘവും കഴിഞ്ഞദിവസം ന്യൂയോർക്ക് നിന്ന് ഡൽഹി വഴി നാട്ടിലേക്ക് തിരിച്ചു.