തിരൂരിൻ്റെ പുണ്യം, പ്രതീക്ഷയുടെ പൂത്തിരി: ഇബ്രാഹിം ഹാജി നയിക്കുമ്പോൾ

തിരൂർ :ജ്ഞാനത്തിൻ്റെ വെളിച്ചം പരത്തിയ തുഞ്ചത്തെഴുത്തച്ഛൻ്റെ പവിത്രമായ മണ്ണാണ് തിരൂർ. ഇവിടെ, വാഗൺ ട്രാജഡിയുടെ നോവുള്ള ഓർമ്മകളും, കോരങ്ങത്ത്, കോട്ട് ജുമാ മസ്ജിദുകളുടെ പ്രാർത്ഥനാ മന്ത്രങ്ങളും, തൃക്കണ്ടിയൂർ ശിവക്ഷേത്രത്തിൻ്റെയും കൊറ്റംകുളങ്ങര ഭഗവതി ക്ഷേത്രത്തിൻ്റെയും ദിവ്യമായ ചൈതന്യവും ഇഴചേർന്നു നിൽക്കുന്നു. ഈ മണ്ണിലിപ്പോൾ, സ്നേഹത്തിൻ്റെയും കാരുണ്യത്തിൻ്റെയും മതേതരത്വത്തിൻ്റെയും നിറസാന്നിധ്യമായി, കീഴേടത്തിൽ ഇബ്രാഹിം ഹാജി നഗരപിതാവായി സ്ഥാനമേൽക്കുകയാണ്. തിരൂർ നിവാസികളുടെ നെഞ്ചിൽ സന്തോഷത്തിൻ്റെ പൂത്തിരി കത്തുന്നു!
കാലങ്ങളായി നാം കണ്ട സ്വപ്നങ്ങൾക്ക്, ഇനി നിറമുള്ള ചിറകുകൾ മുളയ്ക്കും. തിരൂരിൻ്റെ വികസന പാതയിൽ ഒരു പുതിയ ശിൽപ്പം കൊത്തിയെടുക്കാൻ ഇബ്രാഹിം ഹാജിക്ക് കഴിയും.

വിദ്യാഭ്യാസം, ആരോഗ്യം, കായികം – എല്ലാ മേഖലകളിലും അദ്ദേഹത്തിൻ്റെ ദീർഘവീക്ഷണം വെളിച്ചം വീശും.
കോട്ട് കുറുക്കൻ കുന്നിലെ ആയുർവേദ ഡിസ്പെൻസറിക്ക് സ്വന്തമായി ഒരിടം വേണമെന്ന് നാട്ടുകാർ ആഗ്രഹിച്ചപ്പോൾ, മരിച്ച സഹോദരൻ്റെ ഓർമ്മയ്ക്കായി സ്ഥലം വാങ്ങി, അത് നിരുപാധികം നഗരസഭയ്ക്ക് കൈമാറിയ ആ വലിയ മനസ്സ്! എം.പി. ഫണ്ട് ഉപയോഗിച്ച് മനോഹരമായ കെട്ടിടം യാഥാർത്ഥ്യമാക്കാൻ മുൻകൈയ്യെടുത്ത ആ കാരുണ്യത്തിൻ്റെ ഉദാഹരണം ഒന്നു മതി, ഇബ്രാഹിം ഹാജി എന്ന വ്യക്തിത്വം എത്രത്തോളം മാനുഷിക മൂല്യങ്ങൾ ഉയർത്തിപ്പിടിക്കുന്നതാണെന്ന് തിരിച്ചറിയാൻ. കണ്ണീരൊപ്പിയ എത്രയോ ഉമ്മമാരുടെയും അമ്മമാരുടെയും പ്രാർത്ഥനയാണ് ഈ പദവിയിലേക്ക് അദ്ദേഹത്തെ എത്തിച്ചത്.
ജാതി-മത ചിന്തകൾക്കപ്പുറം, എല്ലാവരെയും ഒന്നായി കാണുന്ന, വിശാലമായ ആ മനസ്സാണ് തിരൂരിൻ്റെ ഏറ്റവും വലിയ പ്രതീക്ഷ. വിവേചനങ്ങളില്ലാതെ, എല്ലാവർക്കും തുല്യനീതി ഉറപ്പാക്കുന്ന ഒരു ഭരണമാണ് അദ്ദേഹം കാഴ്ചവെക്കുക.
തിരൂർ നഗരം ഇനി തലയുയർത്തി നിൽക്കും. വരും നാളുകളിൽ വികസനത്തിൻ്റെ ഒരു പെരുമഴക്കാലം തന്നെ ഇവിടെ ഉണ്ടാകും. ആധുനികതയുടെ സൗന്ദര്യവും പാരമ്പര്യത്തിൻ്റെ പവിത്രതയും സമന്വയിക്കുന്ന ഒരു നവ തിരൂരിനെ സ്വപ്നം കാണാൻ നമുക്കിനി ധൈര്യമായി കണ്ണടയ്ക്കാം. കാരണം, സ്വപ്നങ്ങൾക്ക് നിറം നൽകാൻ ഇബ്രാഹിം ഹാജി മുന്നിലുണ്ട്.