ടൊവിനോ തോമസ് നായകനായി തീയറ്ററുകളിൽ നിറഞ്ഞ കൈയടി നേടിയ അജയന്റെ രണ്ടാം മോഷണം ഒടിടിയിലേക്ക്. സ്ട്രീമിംഗ് അവകാശം സ്വന്തമാക്കിയ ഡിസ്നി പ്ലസ് ഹോട്സ്റ്റാറാണ് നവംബർ എട്ട് മുതൽ മലയാളം, ഹിന്ദി, തമിഴ്, കന്നഡ, തെലുങ്ക് ഭാഷകളിൽ എആർഎം സ്ട്രീമിംഗ് ആരംഭിക്കുന്നത്.
സെപ്റ്റംബർ 12ന് തിയറ്ററുകളിൽ എത്തിയ ചിത്രമാണ് അജയന്റെ രണ്ടാം മോഷണം. ജിതിൻ ലാൽ സംവിധാനം ചെയ്ത ചിത്രം റിലീസ് ദിനം മുതൽ മികച്ച പ്രേക്ഷക പ്രതികരണം നേടിയിരുന്നു. കുഞ്ഞിക്കേളു, മണിയൻ, അജയൻ എന്നീ മൂന്ന് വേഷങ്ങളിൽ ടൊവിനോ തോമസ് നിറഞ്ഞാടിയപ്പോൾ പ്രേക്ഷകർക്ക് ലഭ്യമായത് മികച്ച ദൃശ്യവിസ്മയം ആയിരുന്നു. പൂർണമായും ത്രീഡിയിൽ ആണ് അജയന്റെ രണ്ടാം മോഷണം റിലീസ് ചെയ്തത്.
അതേസമയം, അൻപത് ദിവസങ്ങൾ പൂർത്തിയാക്കിയതിന് പിന്നാലെ ആയിരുന്നു ചിത്രത്തിന്റെ ഒടിടി അണിയറ പ്രവർത്തകർ പ്രഖ്യാപിച്ചത്. 100 കോടിയിലേറെ ബോക്സ് ഓഫീസിൽ നിന്നും കളക്ട് ചെയ്ത ചിത്രത്തിന്റെ ബജറ്റ് 30 കോടിയാണെന്ന് നേരത്തെ ടൊവിനോ തോമസ് തുറന്നു പറഞ്ഞിരുന്നു.
ടൊവിനോയ്ക്ക് ഒപ്പം ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, പ്രമോദ് ഷെട്ടി, രോഹിണി എന്നിവര്‍ ചിത്രത്തില്‍ പ്രധാന വേഷത്തില്‍ എത്തിയിരുന്നു. കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരായിരുന്നു അജയന്റെ രണ്ടാം മോഷണത്തിലെ നായിക കഥാപാത്രങ്ങളെ കൈകാര്യം ചെയ്ത നടിമാര്‍.
Leave a Reply