തിരുവനന്തപുരം: സംസ്ഥാന പോലീസ് സേനയിൽ മുഖ്യമന്ത്രിക്ക് എതിരായി പ്രവർത്തിക്കുന്നവർ ഉണ്ടെന്ന് പി വി അൻവർ എംഎൽഎ. സർക്കാർ വിരുദ്ധ പ്രവർത്തനം നടത്തുന്ന സംഘങ്ങൾ പോലീസ് സേനയിൽ ഉണ്ട്. മുഖ്യമന്ത്രിയെ പലരും ചതിക്കുകയാണെന്നും അൻവർ കൂട്ടിച്ചേർത്തു. താൻ ഉന്നയിച്ച ആരോപണങ്ങൾ എല്ലാം സംസ്ഥാനത്തെ ലക്ഷക്കണക്കിന് പാർട്ടി പ്രവർത്തകർക്ക് കൂടി വേണ്ടിയാണ്. ഞാൻ ഉന്നയിച്ച പരാതിക്ക് ഒരുറപ്പും എനിക്ക് എവിടെ നിന്നും കിട്ടിയിട്ടില്ലെന്നും എങ്കിലും നീതിപൂർവമായ അന്വേഷണം നടക്കുമെന്ന് പ്രതീക്ഷയുണ്ടെന്നും അൻവർ പറഞ്ഞു.
എഡിജിപി അജിത് കുമാറിനെ മാറ്റുന്നത് ഞാനല്ല. അദ്ദേഹത്തെ മാറ്റാതെ അന്വേഷണം നടക്കുമ്പോൾ അത് നീതിപൂർവ്വം ആകുമോ എന്ന സംശയം എനിക്കുമുണ്ട്. തിരുവനന്തപുരത്ത് മാധ്യമപ്രവർത്തകരോട് സംസാരിക്കുകയായിരുന്നു പി വി അൻവർ.
സിപിഎം സംസ്ഥാന സെക്രട്ടറി എംവി ഗോവിന്ദന് പരാതി നൽകാൻ എത്തിയതായിരുന്നു അൻവർ. മുഖ്യമന്ത്രിക്ക് കൊടുത്ത അതേ പരാതി തന്നെയാണ് താൻ പാർട്ടി സെക്രട്ടറി കൊടുത്തത്. തന്നെ എലിയായി കാണുന്ന ചിലരുണ്ട് പക്ഷേ എലിയത്ര മോശക്കാരൻ അല്ലെന്ന് അത്തരക്കാർ മനസ്സിലാക്കണമെന്നും അൻവർ കൂട്ടിച്ചേർന്നു.