തിയേറ്ററുകൾ കിട്ടാതെ ‘കളം@ 24’

ജന്മനാ ശരീരത്തെ ബാധിച്ച സെറിബ്രല്‍ പാള്‍സി എന്ന രോഗത്തോട് പൊരുതിയാണ് പന്തളം സ്വദേശി രാഗേഷ് കൃഷ്ണൻ തന്റെ എക്കാലത്തെയും സ്വപ്നമായിരുന്ന ‘കളം @ 24’ എന്ന സിനിമ പൂർത്തീകരിക്കുന്നത്, എന്നാൽ വിരലിലെണ്ണാവുന്ന തിയേറ്ററുകളിൽ മാത്രം ‘കളം @ 24’ ഒതുങ്ങി പോവുകയാണ്.

ഒന്നരവര്‍ഷം കൊണ്ടാണ് രാഗേഷ് ‘കളം @ 24’ എന്ന സിനിമ പൂർത്തിയാക്കിയത്. പരിഹസിച്ചവർക്കും നിന്ദിച്ചവർക്കുമുള്ള മധുരമൂറുന്ന മറുപടി എന്നാണ് സിനിമയുടെ പൂർത്തികരണത്തിൽ രാകേഷ് പ്രതികരിച്ചത്. ഒരുപാട് തിയേറ്ററിലേക്ക് തന്റെ സിനിമയെത്തണമെന്ന ആഗ്രഹം മാത്രം ഇപ്പോഴും ബാക്കിയാവുന്നു.

നിരവധി ഷോർട്ട് ഫിലിമുകൾ സംവിധാനം ചെയ്തതിന് ശേഷമാണ് രാഗേഷ് കൃഷ്ണൻ തന്റെ ആദ്യ സിനിമയുമായി എത്തുന്നത്. പന്തളം, കായംകുളം, നോർത്ത് പറവൂർ, തിരുവനന്തപുരം, കോഴിക്കോട് എന്നിവിടങ്ങളിലാണ്‌ സിനിമ ഷൂട്ട് ചെയ്തിരിക്കുന്നത്. സ്വന്തമായി വിതരണം ചെയ്യുന്നതിനാൽ കുറച്ച് തിയേറ്ററുകൾ മാത്രമാണ് തങ്ങൾക്ക് കിട്ടിയതെന്നും ഒരുപാട് തിയേറ്ററിലേക്ക് തന്റെ സിനിമയെത്തണമെന്ന ആഗ്രഹവും   രാഗേഷ് കൃഷ്ണൻ പങ്കുവച്ചു.

സിനി ഹൗസ് പ്രൊഡക്ഷൻസും സിഎംകെ പ്രൊഡക്ഷനും ചേർന്നാണ് ചിത്രം നിർമിച്ചിരിക്കുന്നത്. അങ്കിത് ജോർജ് അലക്സ്, ശിശിര എന്നിവരാണ് ചിത്രത്തിൽ പ്രധാന വേഷത്തിൽ എത്തുന്നത്. വിശാൽ മോഹൻദാസ് ഛായാഗ്രഹണം നിർവഹിക്കുന്ന സിനിമയുടെ എഡിറ്റിംഗ് ബിഞ്ജു ബാബു ആണ് കൈകാര്യം ചെയ്തിരിക്കുന്നത്. മന്ത്രി സജി ചെറിയാൻ kalam@24 സിനിമയെ പിന്തുണച്ചു രംഗത്ത് എത്തിയിരുന്നു. സാധിക്കുന്നവരെല്ലാം അടുത്തുള്ള തിയേറ്ററിൽ പോയി രാകേഷിന്റെ സിനിമ കാണണമെന്നും. കണ്ടാൽ സോഷ്യൽ മീഡിയയിലോ സുഹൃത്തുക്കളോടോ അഭിപ്രായം പങ്കുവയ്ക്കുകയും പിന്തുണയ്ക്കുകയും വേണമെന്ന് അദ്ദേഹം കുറിപ്പിലൂടെ പങ്കുവെക്കുന്നു .

മന്ത്രി സജി ചെറിയാന്റെ കുറിപ്പ്

‘ലോകസിനിമയിൽ തന്നെ സെറിബ്രൽ പാൾസിയെ മറികടന്ന് കൊണ്ട് സിനിമയെടുത്ത മറ്റാരെങ്കിലും ഉണ്ടെന്ന് തോന്നുന്നില്ല. രാകേഷിന്റെ ഇന്റർവ്യൂകൾ ചിലപ്പോൾ നിങ്ങളിൽ കുറച്ച് പേരെങ്കിലും കണ്ടുകാണും. ആ ചെറുപ്പക്കാരൻ പിന്നിട്ട സഹനവഴികൾ ചിരിച്ചുകൊണ്ട് പറയുമ്പോൾ നമുക്ക് കണ്ണ് നിറയും. ഭക്ഷണം കഴിക്കാൻ പോലും കാശില്ലാതെ വന്നപ്പോൾ ബസ്സ്റ്റാൻഡിൽ ഷർട്ട്‌ ഊരി പിച്ച എടുത്ത കാര്യം വരെ രാകേഷ് പങ്കുവച്ചിട്ടുണ്ട്. സിനിമയോടുള്ള രാകേഷിന്റെ തീവ്രമായ സ്നേഹം പടം റിലീസ് ചെയ്യുന്നതിൽ വരെ എത്തിയിട്ടുണ്ട്. ഈ കൊച്ചു സിനിമ ആകെ കുറച്ചു തിയറ്ററുകളിൽ മാത്രമേയുള്ളൂ. നിങ്ങളിൽ സാധിക്കുന്നവരെല്ലാം അടുത്തുള്ള തിയേറ്ററിൽ പോയി രാകേഷിന്റെ സിനിമ കാണണം. കണ്ടാൽ സോഷ്യൽ മീഡിയയിലോ സുഹൃത്തുക്കളോടോ അഭിപ്രായം പങ്കുവയ്ക്കണം. പിന്തുണയ്ക്കണം. രാകേഷ് അത് അർഹിക്കുന്നുണ്ട്’,