കൊച്ചിയിൽ തരംഗമായി താരം

പിരീഡ് ആക്ഷന്‍ ഡ്രാമ വിഭാ​ഗത്തിൽ
സൂര്യ നായകനായെത്തുന്ന പുതിയ ചിത്രമാണ് കങ്കുവ. ചിത്രത്തിന്റെ  ഭാ​ഗമായി  ഇന്ന് കൊച്ചിയിലെത്തിയ സൂര്യയെ വലിയ ആരവങ്ങളോടെയും ആവേശത്തോടെയുമാണ് ആരാധകർ  സ്വീകരിച്ചത്. ആർപ്പുവിളികൾക്കിടയിലൂടെ താരം നടന്നു പോകുന്നതിന്റെ ദൃശ്യങ്ങൾ സോഷ്യൽ മീഡിയയിൽ വൈറലായി മാറിയിരിക്കുകയാണ്.

ലുലു മാളിൽ വെച്ചാണ് ചിത്രത്തിന്റെ പ്രൊമോഷൻ നടന്നത് . ചിത്രം നവംബർ 14 ന് ആഗോളവ്യാപകമായി 38 ഭാഷകളിൽ തിയറ്ററുകളിലെത്തും. 350 കോടിയാണ് ചിത്രത്തിന്‍റെ ബജറ്റ്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം കേരളത്തിലെ തിയറ്ററുകളിലെത്തിക്കുന്നത്.

സ്റ്റുഡിയോ ഗ്രീനിന്റെ ബാനറിൽ കെ ഇ ജ്ഞാനവേൽ രാജ, യു വി ക്രിയേഷൻസിന്റെ ബാനറിൽ വംശി പ്രമോദ് എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. രണ്ട് ഭാഗങ്ങളായാണ് ചിത്രം ഒരുക്കുന്നത്. ബോളിവുഡ് താരം ബോബി ഡിയോൾ ആണ് ചിത്രത്തിൽ വില്ലനായെത്തുന്നത്. ദിഷ പഠാനിയാണ് നായിക.

മദൻ കർക്കി, ആദി നാരായണ, സംവിധായകൻ ശിവ എന്നിവർ ചേർന്ന് രചിച്ച ഈ ചിത്രം 1500 വർഷങ്ങൾക്ക് മുൻപ് നടക്കുന്ന കഥയാണ് പറയുന്നത്. യോഗി ബാബു, പ്രകാശ് രാജ്, കെ എസ് രവികുമാർ, ജഗപതി ബാബു, ഹരീഷ് ഉത്തമൻ, നടരാജൻ സുബ്രമണ്യം, ആനന്ദ് രാജ്, വസുന്ധര കശ്യപ്, റെഡിന് കിങ്‌സ്‌ലി, കോവൈ സരള എന്നിവരാണ് മറ്റ് പ്രധാന താരങ്ങൾ.