ഇന്ത്യയെ ഭീതിയിലാഴ്ത്തി പ്രമേഹ പഠനം

ഹെല്‍ത്ത് ഡെസ്‌ക്: അന്താരാഷ്ട്ര പ്രമേഹ ദിനമായ നവംബര്‍ 14ന് നടങ്ങിയ ആഗോള പഠനത്തെ അടിസ്ഥാനമാക്കി ദി ലാന്‍സെറ്റില്‍ പ്രസിദ്ധീകരിച്ച ഒരു പ്രബന്ധം അക്ഷരാര്‍ത്ഥത്തില്‍ ഇന്ത്യയെ ഭീതിയിലാഴ്ത്തുന്നുവെന്ന് റിപ്പോര്‍ട്ട്. ഇനിയെങ്കിലും പ്രമേഹത്തെ ഇന്ത്യ എങ്ങനെ നേരിടണം എന്നു ചിന്തിച്ചു തുടങ്ങണമെന്നാണ് റിപ്പോര്‍ട്ടില്‍ പറയുന്നത്. പ്രമേഹം നിയന്ത്രിക്കുന്നത് സംബന്ധിച്ച് ലാന്‍സെറ്റ് പഠനത്തില്‍ ഉന്നയിക്കപ്പെട്ട പ്രശ്‌നങ്ങള്‍ എന്തൊക്കെയാണ്? എന്തുകൊണ്ടാണ് ഇന്ത്യയിലെ പ്രമേഹരോഗികളുടെ എണ്ണത്തെക്കുറിച്ച് ഡോക്ടര്‍മാര്‍ ആശങ്കപ്പെടുന്നത്? എന്ത് നടപടികളാണ് സ്വീകരിക്കേണ്ടത്? ഇതൊക്കെയാണ് ഇന്ത്യന്‍ ആരോഗ്യ വിദഗ്ദര്‍ ആലോചിക്കേണ്ടത്.

പ്രമേഹബാധിതരായ 800 ദശലക്ഷത്തിലധികം മുതിര്‍ന്നവര്‍ ഉണ്ടെന്നാണ് പ്രബന്ധത്തിലുള്ളത്. ഇതില്‍ പകുതിയിലധികം പേര്‍ക്ക് ചികിത്സ ലഭിച്ചില്ല. പഠനമനുസരിച്ച്, ലോകത്ത് ടൈപ്പ് 1 അല്ലെങ്കില്‍ ടൈപ്പ് 2 പ്രമേഹമുള്ള മുതിര്‍ന്നവരുടെ ആകെ എണ്ണം 800 ദശലക്ഷത്തിലധികം കവിഞ്ഞു.1990 ലെ മൊത്തം സംഖ്യയുടെ നാലിരട്ടിയിലധികം. ഇതില്‍ നാലിലൊന്ന് (212 ദശലക്ഷം) ഇന്ത്യയിലാണ് എന്നതാണ് ഇന്ത്യയെ ഭീതിയിലാഴ്ത്തുന്നത്.
ചൈനയില്‍ 148 ദശലക്ഷം. എസ്റ്റിമേറ്റ് അല്‍പ്പം ഞെട്ടിക്കുന്നതാണെന്നാണ് പഠനം വിലയിരുത്തുന്നത്, കാരണം കഴിഞ്ഞ വര്‍ഷം ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് നടത്തിയ പഠനത്തില്‍ രാജ്യത്ത് 100 ദശലക്ഷത്തിലധികം വരുമെന്നായിരുന്നു. ഇതിന്റെ ഇരട്ടിയാണ് ഒരു വര്‍ഷത്തിനുള്ളില്‍ ഇന്ത്യയിലുണ്ടായിരിക്കുന്നത്.

200 രാജ്യങ്ങളിലും പ്രമേഹ വ്യാപനത്തിലും ചികിത്സയിലും 1990 മുതല്‍ 2022 വരെയുള്ള പ്രവണതകള്‍ അവര്‍ കണക്കാക്കി. അതിനാല്‍, ഈ രാജ്യങ്ങളില്‍ ലഭ്യമായ ഡാറ്റ – ഫാസ്റ്റിംഗ് ഗ്ലൂക്കോസ് അല്ലെങ്കില്‍ HbA1C അല്ലെങ്കില്‍ മൂന്ന് മാസത്തെ ഗ്ലൈക്കേറ്റഡ് ഹീമോഗ്ലോബിന്‍ ശരാശരി എടുക്കല്‍ എന്നീ കാര്യങ്ങള്‍ അവര്‍ക്ക് ഉപയോഗിക്കേണ്ടി വന്നു. എന്നിരുന്നാലും, ഐസിഎംആര്‍ പഠനം, രക്തത്തിലെ പഞ്ചസാരയുടെ അളവ് ഉയര്‍ത്തിയ ആളുകളുടെ എണ്ണം കണ്ടെത്തുന്നതിന് ഉപവാസ അളവും രണ്ട് മണിക്കൂര്‍ ഭക്ഷണത്തിനു ശേഷമുള്ള മൂല്യവുമാണ് മാനദണ്ഡമാക്കുന്നത്. ഇന്ത്യയിലെ ഭക്ഷണ രീതിയും ചികിത്സാരീതിയുമെല്ലാം കാര്യമായി പ്രമേഹ സാധ്യത കൂട്ടുന്നതാണ്.ഇതിനിടയില്‍ ശാസ്ത്രീയമല്ലാതെ പ്രമേഹത്തെ നേരിടുന്ന പ്രവണതയും പ്രതിസന്ധി സൃഷ്ടിക്കുന്നു.