മലപ്പുറം:സിപിഐ എം നേതാവും വണ്ടൂർ മുൻ എംഎൽഎയുമായിരുന്ന എൻ കണ്ണനെതിരെ ജമാഅത്തെ ഇസ്ലാമി ചാനലായ മീഡിയ വൺ നടത്തുന്ന വർഗീയ, ദേശവിരുദ്ധ പ്രചാരണങ്ങൾക്കെതിരെ മാധ്യമപ്രവർത്തകർ ഉൾപ്പെടെയുള്ള ജനാധിപത്യ സമൂഹം ശബ്ദമുയർത്തണമെന്ന് സിപിഐ എം ജില്ലാ സെക്രട്ടറിയറ്റ് പ്രസ്താവനയിൽ അഭ്യർഥിച്ചു. 1999 മാർച്ച് 23ന് എൻ കണ്ണൻ നിയമസഭയിൽ അവതരിപ്പിച്ച സബ്മിഷൻ രേഖ പുറത്തുവന്നിട്ടുണ്ട്. തീവ്രവാദ സംഘടനയായ എൻഡിഎഫിനെക്കുറിച്ച് പറഞ്ഞ കാര്യങ്ങൾ മലപ്പുറം ജില്ലയെക്കുറിച്ചാണെന്ന് വരുത്തുകയാണ് മീഡിയ വൺ ചെയ്തത്. ഈ പെരുംകള്ളം തുറന്നുകാട്ടപ്പെട്ടു. സ്വന്തം കാലിലെ മന്ത് മറച്ചുവച്ച് വഴിയെ പോകുന്നവരെ “മന്തുകാലാ’ എന്ന് ആക്ഷേപിക്കുന്ന നിലയിലേക്ക് മീഡിയ വൺ ചാനലും ദാവൂദും തരംതാണു. ഇത് ജേർണലിസമല്ല, ജീർണലിസമാണ്. എൻ കണ്ണൻ എന്ന പൊതുപ്രവർത്തകനെ സമൂഹമധ്യത്തിൽ വ്യക്തിഹത്യ ചെയ്യാൻ നടത്തിയ നീക്കം അപലപനീയമാണ്. ഈ തെറ്റായ പ്രവണതയ്ക്കെതിരെ പൊതുസമൂഹം ജാഗ്രത പാലിക്കണമെന്നും സെക്രട്ടറിയറ്റ് ആവശ്യപ്പെട്ടു.
Leave a Reply