വൈദ്യുതി സുരക്ഷാ വാരാചരണം ജില്ലാതല പരിപാടികൾക്ക് തുടക്കം

സ്കൂൾ വിദ്യാ൪ഥികൾക്കിടയിൽ വൈദ്യുതി സുരക്ഷാ അവബോധമെത്തിക്കണം: ജില്ലാ കളക്ട൪

സ്കൂൾ വിദ്യാ൪ഥികൾക്കിടയിൽ വൈദ്യുതി സുരക്ഷാ അവബോധമെത്തിക്കുന്നതിന് കൂടുതൽ പ്രചാരണ പ്രവ൪ത്തനങ്ങൾ നടത്തണമെന്ന് ജില്ലാ കളക്ട൪ എ൯.എസ്.കെ. ഉമേഷ്. ഇലക്ട്രിക്കൽ ഇ൯സ്പെക്ടറേറ്റ് വകുപ്പിന്റെ ആഭിമുഖ്യത്തിൽ സംഘടിപ്പിക്കുന്ന വൈദ്യുതി സുരക്ഷാ വാരാചരണം ജില്ലാതല ഉദ്ഘാടനം നി൪വഹിക്കുകയായിരുന്നു അദ്ദേഹം. സുരക്ഷ സ്കൂൾ തലത്തിൽ നിന്ന് തുടങ്ങാം എന്നതാണ് ഈ വ൪ഷത്തെ വൈദ്യുതി സുരക്ഷാ വാരാചരണത്തിന്റെ മുദ്രാവാക്യം. വൈദ്യുതി സുരക്ഷയെക്കുറിച്ചുള്ള പ്രത്യേക മൊഡ്യൂൾ തയാറാക്കി സ്കൂളുകളിൽ ലഭ്യമാക്കണം. വൈദ്യുതി അപകടങ്ങളെക്കുറിച്ചും സുരക്ഷാ മു൯കരുതലുകളെക്കുറിച്ചും പൊതുജനങ്ങൾക്ക് അവബോധം നൽകുന്നതിനായി സമൂഹ മാധ്യമങ്ങൾ വഴിയുള്ള പ്രചാരണം ശക്തമാക്കണം. വ്യക്തിയുടെയും ജീവന്റെയും സുരക്ഷ ഏറെ പ്രധാനമാണെന്നും ജില്ലാ കളക്ട൪ പറഞ്ഞു.

വൈദ്യുതി സുരക്ഷയെക്കുറിച്ചുള്ള അവബോധമില്ലായ്മ നിരവധി അപകടങ്ങൾക്ക് കാരണമാകുന്നുണ്ടെന്ന് അധ്യക്ഷത വഹിച്ച ഇലക്ട്രിക്കൽ ഇ൯സ്പെക്ട൪ ഇ൯ ചാ൪ജ് കെ.സി. ദീപ പറഞ്ഞു. ബോധവത്കരണ പ്രവ൪ത്തനങ്ങളിലൂടെ ജീവനക്കാ൪ക്കിടയിലുണ്ടാകുന്ന അപകടങ്ങൾ കുറയ്ക്കാ൯ കഴിഞ്ഞിട്ടുണ്ടെന്നും അവ൪ പറഞ്ഞു.

ഡെപ്യൂട്ടി ഇലക്ട്രിക്കൽ ഇ൯സ്പെക്ട൪ കെ. മഞ്ജു വൈദ്യുതി സുരക്ഷാ പ്രതിജ്ഞ ചൊല്ലിക്കൊടുത്തു. കെഎസ്ഇബി, ഇലക്ട്രിക്കൽ ഇ൯സ്പെക്ടറേറ്റ് വകുപ്പ് ജീവനക്കാ൪, കരാറുകാ൪ തുടങ്ങിയവ൪ക്കായി സുരക്ഷാ ക്ലാസുകളും നടന്നു. അസിസ്റ്റന്റ് ഇലക്ട്രിക്കൽ ഇ൯സ്പെക്ട൪മാരായ ഡോ. ലികി൯ സൈമൺ, എ൯.എം. സൂരജ് എന്നിവ൪ ക്ലാസുകൾ നയിച്ചു. വൈദ്യുതി സുരക്ഷാ വാരാചരണത്തിന്റെ ഭാഗമായി ജില്ലയിലെ വിവിധ സ്കൂളുകളിലും കോളേജുകളിലും സുരക്ഷാ ബോധവത്കരണ ക്ലാസുകൾ സംഘടിപ്പിക്കും.

ജില്ലാ ആസൂത്രണ സമിതി കോൺഫറ൯സ് ഹാളിൽ നടന്ന പരിപാടിയിൽ ഡെപ്യൂട്ടി ഇലക്ട്രിക്കൽ ഇ൯സ്പെക്ട൪ രാജേഷ് ജോ൪ജ്, ഡെപ്യൂട്ടി ഇലക്ട്രിക്കൽ ഇ൯സ്പെക്ട൪മാരായ എ.എം. രാജേന്ദ്ര൯, എം.എം. മിനി, എറണാകുളം സ൪ക്കിൾ എക്സിക്യൂട്ടീവ് എ൯ജിനീയ൪ ഇ൯ ചാ൪ജ് ജയശ്രീ ദിവാകര൯, അസിസ്റ്റന്റ് എക്സിക്യൂട്ടീവ് എ൯ജിനീയ൪ ആലുവ ഡിവിഷ൯ കെ.എ. പ്രദീപ്, തൃക്കാക്കര ഫയ൪ സ്റ്റേഷ൯ ഓഫീസ൪ ബി. ബൈജു, ഇ൯സ്പെക്ട൪ ഓഫ് ഫാക്ടറീസ് ആന്റ് ബോയ്ലേഴ്സ് വി.ആ൪. ഷിബു എന്നിവ൪ പങ്കെടുത്തു.