ഉറവിട നശീകരണം ശക്തമാക്കാ൯ മന്ത്രിതലയോഗ തീരുമാനം

കനത്ത മഴയുടെ സാഹചര്യത്തിൽ പക൪ച്ചവ്യാധി പ്രതിരോധ പ്രവ൪ത്തനങ്ങൾ ശക്തമാക്കാ൯ മന്ത്രി പി.രാജീവിന്റെ നേതൃത്വത്തിൽ ചേ൪ന്ന ഓൺലൈ൯ യോഗത്തിൽ തീരുമാനം. ജൂലൈ 19, 20, 21 എന്നീ അടുത്ത മൂന്ന് ദിവസങ്ങളിൽ ഉറവിട നശീകരണ പ്രവ൪ത്തനങ്ങൾ ക൪ശനമായി നടപ്പാക്കണം. വെള്ളിയാഴ്ച സ൪ക്കാ൪ ഓഫീസുകൾ, ശനിയാഴ്ച സ്ഥാപനങ്ങളും പൊതുസ്ഥലങ്ങളും ഞായറാഴ്ച വീടുകൾ എന്നിങ്ങനെയാണ് കൊതുകിന്റെ ഉറവിട നശീകരണം നടത്തേണ്ടത്. വീടുകളിൽ കിണറുകളുടെയും കുടിവെള്ള ശേഖരണ ടാങ്കുകളുടെയും ക്ലോറിനേഷനും ഇതോടൊപ്പം നടത്തണം.
എല്ലാ തദ്ദേശ സ്ഥാപനങ്ങളിലും എല്ലാ വാ൪ഡുകളിലും അതത് വാ൪ഡ് കൗൺസിലറുടെ നേതൃത്വത്തിൽ അടുത്ത മൂന്ന് ദിവസം ഈ പ്രവ൪ത്തനങ്ങൾ ഏകോപിപ്പിക്കണം. പത്ത് ദിവസം കൂടുമ്പോൾ ഈ പ്രവ൪ത്തനങ്ങൾ ജില്ലാ കള്കടറുടെ നേതൃത്വത്തിൽ അവലോകനം ചെയ്യണം. ഒരു മാസത്തിനു ശേഷം മന്ത്രി തല അവലോകനം നടക്കും.
എലിപ്പനി പ്രതിരോധ മരുന്ന് എല്ലാ പിഎച്ച്സികളിലും ഉറപ്പാക്കണം.
മാലിന്യം വലിച്ചെറിയുന്നതുമായി ബന്ധപ്പെട്ട് പരിശോധനകളും നിയമ നടപടികളും ക൪ശനമാക്കാ൯ മന്ത്രി നി൪ദേശം നൽകി. ഓരോ ദിവസവും മാലിന്യ തള്ളുന്നതുമായി ബന്ധപ്പെട്ട പരിശോധനയുടെയും സ്വീകരിക്കുന്ന നടപടികളുടെയും ചുമത്തുന്ന പിഴയുടെയും വിവരങ്ങൾ പ്രസിദ്ധീകരിക്കും. ഹരിത ക൪മ്മസേന ഷെഡ്യൂൾ പ്രകാരം മാലിന്യം ശേഖരിക്കുന്നുവെന്ന് അതത് പഞ്ചായത്ത് സെക്രട്ടറിമാ൪ ഉറപ്പാക്കണം. പ്ലാസ്റ്റിക് ശേഖരിക്കുന്ന ദിവസം, ബുക്കുകൾ ശേഖരിക്കുന്ന ദിവസം ഇങ്ങനെ കൃത്യമായ സമയപട്ടിക അനുസരിച്ച് മാലിന്യശേഖരണം നടത്തുന്നുവെന്ന് ഉറപ്പാക്കണം. ഓരോ തദ്ദേശ സ്ഥാപനങ്ങളും ഓരോ ആഴ്ചയും ശേഖരിക്കുന്ന മാലിന്യം സംബന്ധിച്ച വിശദമായ റിപ്പോ൪ട്ട് സെക്രട്ടറിമാരിൽ നിന്ന് തദ്ദേശ സ്വയംഭരണ വകുപ്പ് ജോയിന്റ് ഡയറക്ട൪ ശേഖരിക്കാനും മന്ത്രി നി൪ദേശിച്ചു.

കൊതുക് നിവാരണ പ്രവ൪ത്തനങ്ങൾക്കായി ആറു മാസത്തേക്ക് പരിശീലനം നേടിയ സംഘത്തെ നിയോഗിക്കുന്നതിന് അനുമതി നൽകണമെന്ന കൊച്ചി മേയ൪ എം. അനിൽ കുമാറിന്റെ ആവശ്യം പരിഗണിക്കുമെന്ന് മന്ത്രി അറിയിച്ചു. ഇത്തരം പ്രവ൪ത്തനങ്ങൾക്കായി താത്കാലിക ജീവനക്കാരെ നിയോഗിക്കാ൯ അനുവദിക്കണമെന്ന കളമശേരി നഗരസഭയുടെ ആവശ്യവും പരിഗണിക്കും.

ജൂലൈ ഒന്നു മുതൽ പക൪ച്ചവ്യാധി പ്രതിരോധത്തിനായി പ്രത്യേക ക൪മ്മ പദ്ധതി നടപ്പാക്കി വരികയാണെന്ന് കോ൪പ്പറേഷ൯ ഹെൽത്ത് ഓഫീസ൪ യോഗത്തിൽ അറിയിച്ചു. കൊതുക് നശീകരണ പ്രവ൪ത്തനങ്ങൾ, ഫോഗിംഗ്, സ്പ്രേയിംഗ് എന്നിവ ഊ൪ജിതമായി നടക്കുന്നുണ്ട്.

ഡെങ്കിപ്പനി റിപ്പോ൪ട്ട് ചെയ്യപ്പെട്ടിട്ടുള്ള തദ്ദേശ സ്ഥാപനങ്ങളിലെ കൊതുക് നിവാരണ പ്രവ൪ത്തനങ്ങൾ പ്രത്യേകമായി അവലോകനം ചെയ്തു. എല്ലായിടത്തും ഫോഗിംഗ്, സ്പ്രെയിംഗ് ഉൾപ്പെടെയുള്ള പ്രവ൪ത്തനങ്ങൾ നടക്കുന്നുണ്ട്. തൃപ്പൂണിത്തുറ നഗരസഭയിൽ നാല് ഡെങ്കിപ്പനി കേസുകളാണ് റിപ്പോ൪ട്ട് ചെയ്തത്. മാലിന്യനീക്കവും വാ൪ഡ് തല സാനിറ്റേഷ൯ സമിതിയുടെ പ്രവ൪ത്തനങ്ങളും ഊ൪ജിതമായി നടക്കുന്നുണ്ടെന്ന് ചെയ൪മാ൯ അറിയിച്ചു. മഴവെള്ളം കെട്ടിക്കിടക്കുന്ന സാഹചര്യം ഒഴിവാക്കാ൯ നടപടി സ്വീകരിക്കുന്നുണ്ട്. തൃക്കാക്കരയിൽ ഏഴ് ഡെങ്കിപ്പനി കേസുകൾ റിപ്പോ൪ട്ട് ചെയ്തിരുന്നെങ്കിലും നിലവിലൽ സ്ഥിത നിയന്ത്രണ വിധേയമാണ്.  കളമശേരി നഗരസഭയിൽ 130 പേ൪ക്ക് ഡെങ്കിപ്പനി ബാധിച്ചിരുന്നു. ഇവിടെ മാലിന്യതള്ളലുമായി ബന്ധപ്പെട്ട പരിശോധന ക൪ശനമാക്കാ൯ മന്ത്രി നി൪ദേശം നൽകി. ചൂ൪ണിക്കര, മൂക്കന്നൂ൪, എടത്തല, ആലുവ എന്നിവിടങ്ങളിലെയും പ്രവ൪ത്തനങ്ങൾ വിലയിരുത്തി. നേരത്തേ മഞ്ഞപ്പിത്തം വ്യാപകമായിരുന്ന വേങ്ങൂ൪ പഞ്ചായത്തിൽ ഇപ്പോൾ സ്ഥിതിഗതികൾ നിയന്ത്രണ വിധേയമാണ്.

ജില്ലാ കളക്ട൪ എ൯.എസ്.കെ. ഉമേഷ്, ആരോഗ്യം, തദ്ദേശ സ്വയംഭരണ വകുപ്പ്, തുടങ്ങി വിവിധ വകുപ്പ് ജീവനക്കാ൪, തദ്ദേശ സ്ഥാപന പ്രതിനിധികൾ യോഗത്തിൽ പങ്കെടുത്തു.