മലപ്പുറത്ത് നിന്ന് 1,200 അതിഥി തൊഴിലാളികള്‍ കൂടി ബിഹാറിലേക്ക് മടങ്ങും

കോവിഡ് 19: മലപ്പുറം ജില്ലയില്‍ നിന്ന് 1,200 അതിഥി തൊഴിലാളികള്‍ കൂടി ഇന്ന് (മെയ് 04) ബിഹാറിലേക്ക് മടങ്ങും

തിരൂരില്‍ നിന്ന് പ്രത്യേക തീവണ്ടി ഉച്ചയ്ക്ക് രണ്ടിന് ബിഹാറിലെ ദര്‍ബംഗയിലേക്ക് പുറപ്പെടും

ജില്ലയില്‍ കഴിയുന്ന ബിഹാറില്‍ നിന്നുള്ള അതിഥി തൊഴിലാളികളുടെ രണ്ടാം സംഘം ഇന്ന് (മെയ് 04) സ്വന്തം നാട്ടിലേയ്ക്ക് മടങ്ങും. ജില്ലയുടെ വിവിധ ഭാഗങ്ങളില്‍ നിന്നുള്ള 1,200 തൊഴിലാളികളാണ് മടങ്ങുന്നതെന്ന് ജില്ലാ കലക്ടര്‍ ജാഫര്‍ മലിക് അറിയിച്ചു. ഇവര്‍ക്കായി ഏര്‍പ്പെടുത്തിയ പ്രത്യേക തീവണ്ടി തിരൂരില്‍ നിന്ന് ഉച്ചയ്ക്ക് രണ്ട് മണിയ്ക്ക് ബിഹാറിലെ ദര്‍ബംഗയിലേക്ക് പുറപ്പെടും. ബിഹാറിലേയ്ക്കുള്ള ആദ്യ സംഘം മെയ് രണ്ടിന് യാത്രയായിരുന്നു.

സ്വന്തം നാട്ടിലേക്ക് മടങ്ങാന്‍ താത്പര്യം അറിയിച്ച തൊഴിലാളികളെ പൊലീസിന്റെ നേതൃത്വത്തില്‍ ബന്ധപ്പെട്ട് പട്ടിക തയ്യാറാക്കിയിരുന്നു. ഇവര്‍ക്ക് ജില്ലാ ഭരണകൂടം യാത്രാ അനുമതി നല്‍കി. തിരൂരങ്ങാടി, കൊണ്ടോട്ടി എന്നിവിടങ്ങളില്‍ നിന്ന് 250 പേരും പൊന്നാനിയില്‍ നിന്ന് 500, പെരിന്തല്‍മണ്ണയില്‍ നിന്ന് 200 പേരുമാണ് തിരിച്ചു പോകുന്ന രണ്ടാമത്ത സംഘത്തിലുള്ളത്. രാവിലെ എട്ട് മണി മുതല്‍ ഇവരെ അതത് താലൂക്കുകളില്‍ ആരോഗ്യ പരിശോധനകള്‍ക്ക് വിധേയരാക്കും. പിന്നീട് പ്രത്യേകം ഏര്‍പ്പെടുത്തിയ കെ.എസ്.ആര്‍.ടി.സി ബസുകളില്‍ ആരോഗ്യ ജാഗ്രത പാലിച്ച് സുരക്ഷാ ക്രമീകരണങ്ങളോടെ തിരൂര്‍ റെയില്‍വെ സ്റ്റേഷനില്‍ എത്തിയ്ക്കും. പ്രത്യേക തീവണ്ടിയിലും സാമൂഹ്യ അകലം ഉറപ്പാക്കിയാവും യാത്ര.

അതിഥി തൊഴിലാളികളെ കൊണ്ടുപോകാന്‍ വേണ്ട മുന്നൊരുക്കങ്ങളെല്ലാം ജില്ലാ ഭരണകൂടത്തിന്റെ നേതൃത്വത്തില്‍ പൂര്‍ത്തിയാക്കിയിട്ടുണ്ട്. തൊഴിലാളികള്‍ ഒരു കാരണവശാലും നേരിട്ട് റെയില്‍വെ സ്റ്റേഷനുകളില്‍ എത്തരുത്. ജില്ലാ ഭരണകൂടം യാത്രാ അനുമതി നല്‍കിയവരെ മാത്രമായിരിക്കും ഓരോ ഘട്ടങ്ങളിലും കൊണ്ടുപോവുക. നാട്ടിലേയ്ക്ക് മടങ്ങുന്ന തൊഴിലാളികള്‍ക്ക് ആവശ്യമായ എല്ലാ സൗകര്യങ്ങളും ഒരുക്കിയിട്ടുണ്ടെന്നും ജില്ലാ കലക്ടര്‍ അറിയിച്ചു