വ്യാജമദ്യവുമായി കാർ യാത്രക്കാരൻ പിടിയിൽ

ജില്ലാ കളക്ടറുടെ നിർദ്ദേശപ്രകാരം കോവിഡ് -19 പ്രതിരോധ പ്രവർത്തിന്റെ ഭാഗമായി ജില്ലാ അതിർത്തികൾ അടച്ച് കൊണ്ടുള്ള വാഹന പരിശോധനക്കിടെ വ്യാജമദ്യവുമായി കാർ യാത്രക്കാരൻ പിടിയിലായി. ജില്ലാ അതിർത്തിയായ പ്ലാഴിയിൽ ഞായറാഴ്ച (26-04-2020 ) ഉച്ചക്ക് 12 മണിക്ക് ഹെൽത്ത് ഡിപ്പാർട്ട്മെന്റുമായി ചേർന്ന് നടത്തിയ വാഹന പരിശോധനക്കിടെയായിരുന്നു സംഭവം. മോട്ടോർ വാഹന വകുപ്പിലെ അസി. മോട്ടോർ വെഹിക്കിൾ ഇൻസ്പെക്ടർമാരായ ടി. മാത്യു വർഗീസ്, ജയകുമാർ സി.സി, എന്നിവർ നടത്തിയ പരിശോധനയിലാണ് KL-13 AP 6876 എന്ന രജിസ്ട്രേഷനിലുള്ള കാറിൽ നിന്ന് മദ്യം കണ്ടെടുത്തത്. തുടർ നടപടികൾക്കായി വാഹനവും പിടിച്ചെടുത്ത മദ്യവും യാത്രക്കാരെയും പഴയന്നൂർ പോലീസിന് കൈമാറി. വിവരമറിഞ്ഞതിനെ തുടർന്ന് സ്പെഷ്യൽ ബ്രാഞ്ച് ഉദ്യോഗസ്ഥരും സ്ഥലത്തെത്തി. കളക്ടറുടെ നിർദ്ദേശമനുസരിച്ച് ജില്ലാ അതിർത്തികളായ പ്ലാഴി, ആറങ്ങോട്ടുകര എന്നിവിടങ്ങളിൽ ഏപ്രിൽ 25 മുതൽ 24 മണിക്കൂറും മൂന്ന് ഷിഫ്റ്റുകളിലായി മോട്ടോർ വാഹന വകുപ്പ് ഉദ്യോഗസ്ഥർ ഹെൽത്ത് ഡിപ്പാർട്ട്‌മെന്റുമായി ചേർന്ന് വാഹന പരിശോധനകൾ നടത്തിവരുന്നുണ്ട്. ലോക്ക് ഡൗൺ കാലയളവിൽ 24 മണിക്കൂറും കർശനമായി വാഹന പരിശോധനകൾ തുടരാൻ മോട്ടോർ വാഹന വകുപ്പിലെ ഉദ്യോഗസ്ഥരെ ചുമതലപ്പെടുത്തിയാതായി തൃശ്ശൂർ ആർ.ടി.ഒ. ഷാജി മാധവൻ അറിയിച്ചു.