1470-490

കോവിഡ് 19: മലപ്പുറം ജില്ലയില്‍ രണ്ട് പേര്‍ കൂടി രോഗമുക്തരായി വീട്ടിലേക്ക് മടങ്ങി

വിദഗ്ധ ചികിത്സക്ക് ശേഷം ആശുപത്രി വിട്ടത് ചെമ്മാട്, തെന്നല സ്വദേശികള്‍

കോവിഡ് 19 ബാധിച്ച് വിദഗ്ധ ചികിത്സക്ക് ശേഷം രോഗം ഭേദമായ രണ്ട് പേര്‍ കൂടി മഞ്ചേരി ഗവ. മെഡിക്കല്‍ കോളജ് ആശുപത്രിയില്‍ നിന്ന് വീട്ടിലേക്ക് മടങ്ങി. ചെമ്മാട് ബൈപ്പാസ് റോഡ് സ്വദേശി മഞ്ഞമാട്ടില്‍ അബ്ദുള്‍ ഹക്കീം (33), കോഴിച്ചെന തെന്നല വാളക്കുളം സ്വദേശി കോഴിക്കല്‍ മുഹമ്മദലി (48) എന്നിവരാണ് ആശുപത്രി വിട്ടത്. ഇതോടെ ജില്ലയില്‍ കോവിഡ് 19 ഭേദമായി ആശുപത്രി വിട്ടവരുടെ എണ്ണം 11 ആയി. നിലവില്‍ ഏഴ് പേരാണ് രോഗബാധിതരായി ഐസൊലേഷനില്‍ ചികിത്സയില്‍ തുടരുന്നത്. രോഗം ഭേദമായി ആശുപത്രിയില്‍ പ്രത്യേക നിരീക്ഷണത്തില്‍ തുടരുന്നതിനിടെ ഒരാള്‍ ഇന്നലെ (ഏപ്രില്‍ 18) മരിക്കുകയും ചെയ്തു.

മാര്‍ച്ച് 11, 12 തീയ്യതികളില്‍ ഡല്‍ഹി നിസാമുദ്ദീനിലെ സമ്മളനത്തില്‍ പങ്കെടുത്ത്  മടങ്ങിയ ചെമ്മാട് സ്വദേശി അബ്ദുള്‍ ഹക്കീമിന് ഏപ്രില്‍ ആറിനാണ് വൈറസ് ബാധ സ്ഥിരീകരിച്ചത്. കോഴിച്ചെന തെന്നല വാളക്കുളം സ്വദേശി മുഹമ്മദലിക്ക് ഏപ്രില്‍ 10 നും രോഗബാധ സ്ഥിരീകരിച്ചു. ഇയാളും നിസാമുദ്ദീന്‍ സമ്മേളനത്തല്‍ പങ്കെടുത്താണ് നാട്ടില്‍ തിരിച്ചെത്തിയിരുന്നത്. രോഗബാധ സ്ഥിരീകരിച്ച ശേഷം ഇരുവരും കോവിഡ് പ്രത്യേക ചികിത്സാ കേന്ദ്രമായ മഞ്ചേരി ഗവ. മെഡിക്കല്‍ കോളജ് ആശുപത്രിയില്‍ ഐസൊലേഷനിലായിരുന്നു.

മുഖ്യമന്ത്രിയുടെ നേതൃത്വത്തില്‍ സംസ്ഥാന സര്‍ക്കാറും ആരോഗ്യ വകുപ്പും ജില്ലാ ഭരണകൂടവും തങ്ങള്‍ക്ക് ഉറപ്പാക്കിയ കരുതലിനും മികച്ച ചികിത്സക്കും ഐസൊലേഷന്‍ കേന്ദ്രത്തില്‍ നിന്ന് പുറത്തിറങ്ങിയ ഇരുവരും നന്ദി പറഞ്ഞു. ഡോക്ടര്‍മാര്‍ മുതല്‍ ശുചീകരണ തൊഴിലാളികള്‍ വരെയുള്ള മുഴുവന്‍ ആശുപത്രി ജീവനക്കാരോടും കടപ്പാടുണ്ടെന്നും ജില്ലാ മെഡിക്കല്‍ ഓഫീസില്‍ നിന്നും കലക്ടറേറ്റില്‍ നിന്നും ദിവസവും തങ്ങളെ തേടിയെത്തുന്ന ഫോണ്‍ കോളുകള്‍ ആത്മവിശ്വാസം വര്‍ധിപ്പിച്ചെന്നും ഹക്കീമും മുഹമ്മദലിയും പറഞ്ഞു. പോകുന്നതിന് മുമ്പ് ഒരു ആഗ്രഹവും കൂടി ഇവര്‍ പങ്കുവച്ചു, എല്ലാം ശരിയായതിന് ശേഷം മുഖം കാണാതെ പരിചരിച്ച ഡോക്ടര്‍മാരെയും മറ്റു ജീവനക്കാരെയും ചേര്‍ത്തൊരു ഒത്തുചേരല്‍.  വീട്ടിലെത്തിയാലും ആരോഗ്യ വകുപ്പിന്റെ നിര്‍ദേശപ്രകാരം തങ്ങള്‍ പ്രത്യേക നിരീക്ഷണത്തില്‍ തുടരുമെന്ന് ഇരുവരും അറിയിച്ചു.

മഞ്ചേരി മെഡിക്കല്‍ കോളേജ് ആശുപത്രി സൂപ്രണ്ടും കോവിഡ് ജില്ലാ സര്‍വൈലന്‍സ് ഓഫീസറുമായ ഡോ. കെ.വി നന്ദകുമാര്‍, നോഡല്‍ ഓഫീസര്‍ ഡോ. ഷിനാസ് ബാബു, ഡോക്ടര്‍മാര്‍, നഴ്‌സുമാര്‍, മറ്റു ആശുപത്രി ജീവനക്കാര്‍ എന്നിവര്‍ ചേര്‍ന്നാണ് ഇരുവരേയും യാത്രയാക്കിയത്.

Comments are closed.