1470-490

മനുഷ്യന് ജീവന്‍ ഉണ്ടാക്കാനും സാധിക്കും

സുരേഷ് സി പിള്ള കഴിഞ്ഞ ആഴ്ചവരെ മനുഷ്യന് ജീവന്‍ ഉണ്ടാക്കാന്‍ പറ്റുമോ എന്നുള്ളത് ഒരു  കെട്ടുകഥ ആയിരുന്നു. എന്നാല്‍, കേംബ്രിഡ്ജില്‍   ഉള്ള മെഡിക്കല്‍ റിസര്‍ച്ച് കൗണ്‍സില്‍ ലബോറട്ടറി ഓഫ് മോളിക്യൂലാര്‍ ബയോ ളജി യിലെ ശാസ്ത്രജ്ഞര്‍  ഇ. കോളി  (Escherichia coli) ബാക്റ്റീരിയയുടെ ജനിതക ഘടന പൂര്‍ണ്ണമായും ലാബില്‍ നിര്‍മ്മിച്ചതായി ലോകത്തെ അറിയിച്ചു.   ഈ പഠനത്തിന്റെ  വിശദാംശങ്ങള്‍ ഈആഴ്ചത്തെ നേച്ചര്‍ എന്ന ശാസ്ത്ര ജേര്‍ണലില്‍ പ്രസിദ്ധീകരിച്ചിട്ടുണ്ട്. Total synthesis of Escherichia coli with […]

സുരേഷ് സി പിള്ള

കഴിഞ്ഞ ആഴ്ചവരെ മനുഷ്യന് ജീവന്‍ ഉണ്ടാക്കാന്‍ പറ്റുമോ എന്നുള്ളത് ഒരു  കെട്ടുകഥ ആയിരുന്നു. എന്നാല്‍, കേംബ്രിഡ്ജില്‍   ഉള്ള മെഡിക്കല്‍ റിസര്‍ച്ച് കൗണ്‍സില്‍ ലബോറട്ടറി ഓഫ് മോളിക്യൂലാര്‍ ബയോ ളജി യിലെ ശാസ്ത്രജ്ഞര്‍  ഇ. കോളി  (Escherichia coli) ബാക്റ്റീരിയയുടെ ജനിതക ഘടന പൂര്‍ണ്ണമായും ലാബില്‍ നിര്‍മ്മിച്ചതായി ലോകത്തെ അറിയിച്ചു.  

ഈ പഠനത്തിന്റെ  വിശദാംശങ്ങള്‍ ഈആഴ്ചത്തെ നേച്ചര്‍ എന്ന ശാസ്ത്ര ജേര്‍ണലില്‍ പ്രസിദ്ധീകരിച്ചിട്ടുണ്ട്. Total synthesis of Escherichia coli with a recoded genome (2019 May, DOI 10.1038/s41586-019-1192-5). അമിനോ ആസിഡുകള്‍ ഉണ്ടാക്കാം, പ്രോട്ടീനുകള്‍ ഉണ്ടാക്കാം, ജീവ കോശങ്ങളില്‍ നിന്ന് ക്ലോണുകള്‍ ഉണ്ടാക്കാം എന്നൊക്ക നേരത്തെ കണ്ടെത്തിയിരുന്നല്ലോ. ജീവന്‍ മാത്രം ലാബില്‍ ഉണ്ടാക്കാന്‍ മനുഷ്യന് കഴിഞ്ഞിരുന്നില്ല. ഒരു ജീവിയുടെ DNA കൃത്രിമമായി ഉണ്ടാക്കി, ജീവന്‍ നല്‍കുന്നത് ആദ്യമാണ്. 
സിന്തറ്റിക് ബിയോളജി (മനുഷ്യനിര്മ്മിത ജീവശാസ്ത്ര പഠനം) യില്‍ ഇതൊരു നാഴികക്കല്ലാണ് എന്ന് നിസ്സംശയം പറയാം.  

ബാക്റ്റീരിയയുടെ ജനിതകഘടന (genome) പൂര്‍ണ്ണമായും പഠിച്ചിട്ട് അവ ലാബില്‍ സംശ്ലേഷണം ചെയ്‌തെടുക്കുക ആയിരുന്നു. ബാക്റ്റീരിയകള്‍ ജീവനോടെ ഉണ്ട്, അവ പ്രത്യുത്പാദനം നടത്തുന്നുണ്ട്. 

വംശപാരമ്പര്യത്തിന്റെ അടിസ്ഥാന  ഘടകം ജീനുകള്‍ ആണ് എന്ന് സ്‌കൂളില്‍ പഠിച്ചിട്ടുണ്ടല്ലോ? ഓരോ  ജീനുകളും ഉണ്ടാക്കിയിരിക്കുന്നത്  DNA കൊണ്ടാണ് എന്നും പഠിച്ചത് ഓര്‍മ്മിക്കുമല്ലോ? ഓരോ ജീനുകളും നാല് അമിനോ ആസിഡുകളുടെ ആയിരക്കണക്കിന് യൂണിറ്റുകള്‍  കൊണ്ടാണ്  
 
 ഡി എന്‍ എ തന്മാത്ര എന്നാല്‍ നാലുതരം ബേസുകള്‍ അടങ്ങിയ ഒരു ബയോ-പോളിമര്‍ ആണ്. ഇവയെ A (adenine ), C (cytosine ), G (guanine), T (thymine) എന്ന് പറയും. വാക്കുകള്‍ ബന്ധിച്ചു കഥയും കവിതയും ഉണ്ടാകുന്ന പോലെ ഈ നാലുതരം ബേസുകളൂടെ പ്രത്യേക വിന്യാസം കൊണ്ട് അതില്‍ ജനിതക വിവരങ്ങള്‍ ശേഖരിക്കപ്പെടും. ഇങ്ങനെയുള്ള ബേസുകളുടെ പ്രത്യേകമായുള്ള വിന്യാസം ആണ് അടുത്ത തലമുറയിലേക്ക് പാരമ്പര്യ സ്വഭാവങ്ങള്‍ കൈമാറുന്നത്. ഇതിനാണ് ജീന്‍ എന്ന് പറയുന്നത്. ഓരോ സ്വഭാവത്തിനും ഓരോ തരം ബേസ് വിന്യാസങ്ങള്‍ (ജീന്‍) കാണും. വിഭജിക്കപ്പെടുന്ന കോശങ്ങളിലെ ഡി എന്‍ എ അതിന്റെ തനി പകര്‍പ്പ് ഉണ്ടാക്കി അടുത്ത തലമുറകളിലേക്ക് കൈമാറുന്നു.

 ഭൂമിയുടെ പ്രായം 450 കോടി വര്‍ഷമാണ്. ബാക്ടീരിയ പോലെയുള്ള ഒറ്റ കോശജീവികള്‍ ആദ്യമായി ഉണ്ടായത്, 380 കോടി വര്‍ഷങ്ങള്‍ക്കു മുന്‍പാണ്. ബഹുകോശജീവികള്‍ ഉണ്ടായത് അതും കഴിഞ്ഞു വളരെ വര്‍ഷങ്ങള്‍ക്കു ശേഷമാണ്. ഏകദേശം 57 കോടി വര്‍ഷങ്ങളെ ആയുള്ളൂ, ബഹുകോശ ജീവികള്‍ ഉണ്ടായിട്ട്. അതിനു ശേഷമാണ് ആന്ത്രപ്പോഡുകള്‍ അഥവാ ക്ലിപ്ത ചേര്‍പ്പുകളോടു (exoskeleton) കൂടിയ ശരീരമുള്ള ജന്തുക്കള്‍ ഉണ്ടായത്. ഭൗമോപരിതലത്തിലുള്ള സസ്യങ്ങള്‍ ഉണ്ടായിട്ട് 47.5 കോടി വര്‍ഷങ്ങളെ ആയുള്ളൂ. കാടുകളുണ്ടായിട്ട്, 38.5 കോടി വര്‍ഷവും സസ്തിനികള്‍ ഉണ്ടായിട്ട് 20 കോടി വര്‍ഷവുമേ ആയുള്ളൂ.

ജീവ തന്മാത്രകള്‍ ഉണ്ടായതിനെപ്പറ്റി യുള്ള വളരെ വലിയ ഒരു ധാരണയാണ് ഈ കണ്ടുപിടിത്തത്തോടെ ഊട്ടി ഉറപ്പിച്ചിരിക്കുന്നത്. അതായത് ബയോളജിക്കും മുന്‍പേ കെമിസ്ട്രിയാണ് ജീവന്‍ തുടങ്ങാന്‍ കാരണം! 

അപ്പോള്‍ ഭൂമിയില്‍ ജീവന്‍ ഉണ്ടായതോ?
ശക്തമായ ഇടിമിന്നല്‍ പോലെ, ഭൂമിയിലെ പ്രകൃതിദത്തമായ ചില പ്രക്രിയകള്‍ കൊണ്ടാവാം ഇനോര്‍ഗാനിക് മൂലകങ്ങള്‍ ചേര്‍ന്ന് ഓര്‍ഗാനിക് ജീവ-തന്മാത്രകള്‍ ഉണ്ടായത്. അന്തരീക്ഷത്തിലുള്ള വാതകങ്ങളായ അമോണിയ, മീഥേന്‍, ജലബാഷ്പം, കാര്‍ബണ്‍ ഡൈ ഓക്‌സൈഡ് തുടങ്ങിയവ പ്രത്യേക അനുപാതത്തില്‍ യാദൃശ്ചികമായി ചേര്‍ന്നാവാം ആദ്യ ജീവകണിക ഉണ്ടായതെന്ന് അനുമാനിക്കുന്ന ശാസ്ത്രജ്ഞരുണ്ട്.

ഇങ്ങനെ അമിനോ ആസിഡുകളും ഡി എന്‍ എ യും ആര്‍ എന്‍ എ യും ഒക്കെ പല സംവത്സരങ്ങള്‍ കൊണ്ട് ഉണ്ടായിവന്നു. പലതരം രാസപ്രവര്‍ത്തനങ്ങള്‍ കൊണ്ട് സ്വന്തം കോപ്പികള്‍ നിര്‍മ്മിക്കാന്‍ പ്രാപ്തമായ ജീവതന്മാത്രകളെ സൃഷ്ടിച്ചതാണ് ജീവോത്പത്തിക്ക് കാരണം. അങ്ങനെ മുകളില്‍ പറഞ്ഞ പോലെ ഏകകോശജീവികള്‍ ഉണ്ടായി, പിന്നെ ബഹുകോശ ജീവികള്‍. ഇതിന് കാലക്രമേണ പരിണാമം സംഭവിച്ചു ജീവവൈവിദ്ധ്യം ഉണ്ടായി.

ബാക്ടീരിയയുടെ ജനിതക ഘടന ലാബില്‍ ഉണ്ടാക്കിയില്ലേ  അപ്പോള്‍ മനുഷ്യനുള്‍പ്പെടെയുള്ള  ഏതു ജീവിയേയും നമുക്ക് ലാബില്‍  ഉണ്ടാക്കാന്‍ പറ്റില്ലേ? സൈദ്ധാന്തികമായി പറഞ്ഞാല്‍ പറ്റണം, പക്ഷെ ഇത് വളരെ ചിലവേറിയതും, വളരെ വര്‍ഷങ്ങള്‍ നീണ്ട പ്രക്രിയയയും ആണ്. ഹാര്‍വാര്‍ഡ് മെഡിക്കല്‍ സ്‌കൂളിലെ പോസ്റ്റ് ഡോക്ടറല്‍ ഗവേഷകന്‍ ആയ James Kuo പറഞ്ഞത് ‘Tacking bases together to make genomes remains enormously costly. ‘It’s just way too expensive for academic groups to keep pursuing,’  എന്നാണ് (Scientists Created Bacteria With a Synthetic Genome. Is This Artificial Life? ന്യൂ യോര്‍ക്ക് ടൈംസ്, May 15, 2019). 

Yuval Noah Harari എഴുതിയ Sapiens: A Brief History of Humankind എന്ന പുസ്തകത്തില്‍ പറഞ്ഞ പോലെ ജീവന്റെ ചരിത്രം   ഒറ്റവാക്കില്‍ പറഞ്ഞാല്‍ ആദ്യം ഫിസിക്‌സ് (ബിഗ് ബാംഗ്), പിന്നെ കെമിസ്ട്രി (ആറ്റങ്ങള്‍, തന്മാത്രകള്‍), പിന്നെ ബയോളജി, പിന്നെ ജീവ പരിണാമം, മനുഷ്യന്‍, ദൈവം, കഥകള്‍, പിന്നെയാണ് ഹിസ്റ്ററി. 

 അപ്പോള്‍ ആത്മാവ്?
ജീവന്‍ ഉണ്ടാകാന്‍ ആത്മാവും വേണ്ട എന്നു കൂടിയാണ് ഈ പഠനങ്ങള്‍ തെളിയിക്കുന്നത്. ബയോ-മോളിക്യൂളുകളുടെ കൃത്യമായ കൂടിച്ചേരലുകള്‍ ആണ് ജീവന്‍ ഉണ്ടാക്കുന്നത്. ഒരു ബലൂണ്‍ തലമുടിയില്‍ കുറെ നേരം ഉരസിയാല്‍ ‘സ്റ്റാറ്റിക് ഇലെക്ട്രിസിറ്റി’ ഉണ്ടാവില്ലേ?  അതുപോലെ ബയോ-മോളിക്യൂളുകളുടെ കൃത്യമായ കൂടിച്ചേരലുകള്‍  അവയുടെ പ്രത്യേക വിന്യാസം എന്നിവ  കൊണ്ട് അതില്‍ ജനിതക വിവരങ്ങള്‍ ശേഖരിക്കപ്പെടുവാന്‍ പറ്റും.   വിഭജിക്കപ്പെടുന്ന കോശങ്ങളിലെ ഡി എന്‍ എ അതിന്റെ തനി പകര്‍പ്പ് ഉണ്ടാക്കുന്നു, അവ  അടുത്ത തലമുറകളിലേക്ക് കൈമാറുന്നു. അല്ലാതെ എവിടെ നിന്നോ വരുന്ന ആത്മാവല്ല ജീവന്‍ ഉണ്ടാക്കുന്നത്  എന്നും കൂടി ഈ പഠനത്തില്‍ നിന്നും മനസ്സിലാക്കാന്‍ പറ്റും. 
ReplyForward

Comments are closed.

x

COVID-19

India
Confirmed: 31,440,951Deaths: 421,382